ـ1ـ
بْصَلّيلَكْ يا مارْ مارونْ
وْبِطْبَعْ عَ شْفَافي إسْمَكْ
مْرافَقْني مَطْرَحْ ما بْكونْ
حامِلْ بِقلْبي رَسْمَكْ
يا بَيّ الْما مِتْلَكْ بَيّْ
يا خَيّ وْأكْبَرْ مِنْ خَيّْ
يا قِدِّيس الْذِكْرَكْ حَيّْ
النّور بْيِشْرُق مِنْ جِسْمَكْ
ـ2ـ
عَ طولْ بْتِحْكي الأزْمانْ
حارَبْتْ الوَثَنِيّه
وْشَعْبَكْ وِزَّعْتُو بْلُبْنانْ
وْإِسّسَتْ الْمارُونِيّه
يا رَيّسْ دَيْرْ الرّهْبانْ
ناسِكْ.. صَوْمِعْتَكْ إيمانْ
بِوْجُودَكْ فِرِحْ الدَّيّانْ
وْزِيّنتْ الْمَسِيحيّه
ـ3ـ
سِرْياني.. مِنْ سُورِيّا
بَخّورَكْ عَطّر هَالْكَوْنْ
وْصِرْت الدّنيي تِهْدِيَّا
وِتْلَوّنْها بْأجْمَلْ لَوْن
يا إنْطاكي الْفَرْحَه زيدْ
الْعالَمْ تِشْريدْ وْتِنْهيدْ
مِشْتاقينْ يْطِلّ العيدْ
عْمِلَّكْ شِي عَجِيبِه هَوْنْ
**
